201213 墾丁台北跨年七天之旅 Day3 (夜宿海生館DAY2、台北市)

嘩~
對上一次講呢個旅行已經係一年前，因為太忙的關係，連打blog的時間都無，有時間都用左來休息同埋去玩。希望之後可以繼續update下可以同小朋友去的地方與大家分享一下。

去到旅程的第三日，我地亦係時候離開墾丁，向台北出發。

一早係海底隧道起身之後，海生館方面亦提供早餐，只要攞住早餐卷就可以食。有早餐同埋西餐選擇，不過其實都係一d好普通的食物來，叫做填飽個肚有力繼續行程囉。

早上其實係無乜特別節目的，唯一節目就係大洋池的餵魚的表演，同埋整個海生館未開門，你可以係極少人的情況下慢遊海生館同影相。不過我地就剛好見到係開館前努力係到清楚魚缸的潛水人，小朋友仲睇得津津有味。最後我地參觀左極地館，睇左企鵝同海豹表演之後就離開了。因為今日的行程比較遠，地要先回高雄交車，再坐高鐵到台北。自駕的車程都要兩三小時，所以就係午飯前離開啦。

不過總括來說都係一個十分特別的體驗，尤其以小朋友來說，可以係水族館訓覺，遊覽點都係一件開心事。可能係因為我自己本身去過兩次海生館，所以先覺得D節目唔吸引。不過咁，我去的時候係2012年的活動內容，我知道佢地係2013年開始已經轉左一D內容，大家可以上網參考下。

夜宿海生館

 點解有人係水裏面既？

 

自駕遊墾丁其實真係好方便，如果你有小朋友就更加方便。一來墾丁唔似得台北高雄一樣有鐵路運輸交通便利，二來景點同景點之間亦遠，有車的話你可以節省不少時間，帶住小朋友每個景點等公車都真係十分煩惱。但係如果你係一d大時大節的日子去台灣的話，自駕就未必係一個好選擇，因為會台灣人亦會係這些日子一些熱門的地點旅行，會令道路十分塞車。離開前係台灣牛門外的公園玩左一陣，呢度有舊火車同少量小朋友設施。

經過漫長的駕駛之後，終於去到高雄。而還車的地點亦十分方便，係左營高鐵站外就有還車的地點，還完車就可以立即上車，出發去台北！我係台灣租過兩次車，感覺上格上租車比小馬好。車新淨一D，服務亦好一點，最少迅速一點，我第一次係小馬佢攪左我一小時…俾晒兩個網大家睇下，你搵啱車型後可以電郵佢，有時會有折扣呢。

格上租車
小馬租車

其實已經唔係第一次坐高鐵，但係對於鐵路迷的小朋友來講，每日都坐其實都無問題的。如果唔係特別日子，假期，其實你去到立即買就可以，簡單到同你係香港買地鐵票無分別。而且可以選擇的站少，只係由台南左營去到台北，買錯票的機會十分低。台灣高鐵由日本新幹線700系演變而成，如果你喜歡新幹線但係又未有機會去日本，來台灣試下高鐵先都可以。

去到台北車站，再轉捷運去雙連站，今次我地住的酒店係華泰王子大飯店，雙連站呢邊雖然唔近一D你常去的景點，不過距離台北車站都係兩個站，而且附近好多小型食店，啱晒喜歡食野同夜蒲既我。而且房間都唔算細，清潔程度亦不錯，有時帶住小朋友去旅行，又真係要住一D房間大一點，清潔一點的酒店。如果住一D好似西門町附近的酒店，係好方便，不過真係太細了，訓埋小朋友的話，咁爸爸帶定睡袋都可以了。上網睇話酒店的中菜廳係好味道的，不過我地總共住左三晚，完全無機會食過，因為全部都俾人訂晒了，有一晚就有人結婚，可能真係好好味啦…

時間已經去到四五點，我地休息左一陣，就出去搵野食。

今晚安排的膳食係好多香港人都話好食的肥前屋，坦白講，佢地的鰻魚又真係好好味，起碼我係香港未食過差不多質素的。當然，我係香港又未食過貴鰻魚。

大約七點去到已經排晒隊。
店內個師傅不斷燒不斷燒，都未見佢停過手…

又真係好好味既，個汁係香港真係食唔到。不過我呢D怕食魚因為有骨既人，就覺得佢D去骨唔係咁好。而我地亦叫左一個滑蛋豬扒飯，呢個飯呢，乾身無汁，唔試亦無妨。下次來台北，要試埋其他鰻魚飯店呢！話說有四大鰻魚飯係台北這兒呢。

題外話，我返香港之後有同事話我知佢男朋友曾經係呢到食飯俾鰻魚骨卡喉嚨，要係台灣睇醫生。大家去食的時候都小心一點。

iPeen 愛評網 > 肥前屋

睇過一D旅遊介紹話雙連站同中山站附近以前係日本人聚居的地方，所以亦特別多居酒屋之類的店鋪，如果下次有機會要試下先。
係附近行左陣，小朋支經過一日的交通都十分疲倦，回酒店沖涼又係時候訓覺。明天就正試展開台北之旅啦。