FAM 樂活.家 親子智慧雜誌 斗室中的黑夜障礙賽

六百呎的蝸居，漆黑一片，禧樂與朋友寶寶兩個小不點站在大門處，額上綁著一盞爬山用的頭燈，雙手雙腳好像在等候發動的汽車引擎。「一、二、三開始！」禧樂的媽媽一聲令下劃破了暗室中的寧靜，兩個孩子像毛蟲一樣，迅速俯身竄入用幾張椅子及棉被搭建而成的隧道內（Playright遊戲師薯仔爸爸點評：最便宜的隧道，也是最實用的帳篷，不費分文，不用到玩具店買，好！），爬呀爬，很快便從隧道的另一端鑽出來，迎上等待著他們的第二關卡。

露營體驗 東華三院上水馬草壟汽車露營營地

秋天開始過去，冬天又來了，你又開始計劃帶你的小朋友去郊遊未呢？近來的天氣十分好，日間有太陽，有藍天白雲，在郊外更有涼風送爽，你不會繼續和你的小朋友留在室內，錯過一年間，最合適戶外活動的時機吧！

而戶外活動方面，除了可以與你的子女遠足、野餐等等外，你有想過和你的子女去露營嗎？但你又會否擔心地點、裝備、技術未能適合你與子女一同去露營？其實你大可以放心，現在很多的宿營的場所，只要場地許可，都會提供或租借露營的裝備給租用人仕。而且在有營地包圍的環境下，我相信你與子女的安全也會比你在郊外露營來得有保障。當然，如果你是一位專業的野外活動人仕就不用考慮這點啦。

今次我們去了由東華三院主理的上水馬草壟汽車露營營地，這兒位處上水馬草壟鄰近邊境。這個營地應該係香港第一個打正旗號，做汽車露營的地方。當然，你會問，如果我有車，我為甚麼要來這兒呢？我認為租用汽車營地有優勝的地方，但當然有它的缺點，這些留待之後才講。

小惡魔玩轉高雄台中 (台中清境篇4) 百里香牛肉麵

來到最後一天，坦白講真的不想回香港。每天和一群小朋友一起玩樂，雖然有煩惱，但其實開心永遠比煩惱多！由第一日的旅程開始，每天和自己的小朋友，以及其他同學仔一起遊玩，與家長及小朋友們的情誼都加深了不少。當中其實有不少的趣事，和處理數十次的爭執、調解，連自己與小朋友相處的耐性與功力都覺得加強了！

不過我今次想介紹的內容，其實不是在最後一天發生的，而係我們到台中就已經發現的。話說喜好麵食的我，來到台灣當然要努力嘗試不同種類的牛肉麵，所以讓我無意中發現到酒店附近的一間傳說級牛肉麵店。而為左一嚐店家的手藝，我們要去了兩次才可以有機會嘗試得到。發現這家牛肉麵也很隨意，就因為在GOOGLE想找好吃的牛肉麵，而剛好店就在附近而已，所以有時隨心旅行，才會發現到那地方的一些好東西。

如果係香港，我相信你會覺得非常不可思義，因為這家牛肉麵店最傳說的地方，就係佢既營業時間，佢每天只係大約由五點三十分，營業至七點三十分就賣完了。是的，你無睇錯，佢只係做兩小時生意，如果遲左，恭喜你，你可以明天請早了。

色級野外定向比賽 扶輪公園

星期日大家通常有甚麼活動呢？和小朋友去那兒玩？還是忙於一天連走十個興趣班？亦可以係家努力溫習。而在剛剛過去的星期日，我們就選擇了參加野外定向比賽。無錯，就係攞住指南針、地圖遊走於山野間的活動。原來小朋友咁細個都可以參加？係架，其實佢自己可以行山，可以有足夠體力行返個多小時，你已經可以同佢一齊玩。

一般來說，野外定向比賽係個人制的，但其實亦有團體制的，通常係家庭組、體驗組之類，等大家可以試下之餘亦不會有甚麼危險。而難度亦會係最簡單的，以今次係大帽山扶輪公園的比賽為例，其實家庭組只係圍住遠足研習行個大圈，輕鬆得來又可以體驗一下。我地係香港野外定向總會報名的。你報名後，佢地會確認你，你只係需要於當日準時到達出發地點報到就可以，非常方便同簡約。

小惡魔玩轉高雄台中 (台中清境篇3) 清境之星民宿、清境魯媽媽雲南擺夷料理、清清草原、羊咩咩脫衣秀

繼續上一篇的旅程，話說我們在台中食完一頓好開心的午餐之後，係時候去攞車，出發往清境農場。如果你係去過的話，你就會發現整個清境旅遊區，已經唔只係農場，當中最大部份的應用係民宿、民宿同民宿。實際農場的部份只係整個旅遊產業鏈中的一部份。聽聞當初係為左安頓內戰的台兵，所以提供一個地方給他們開墾，發展的。後來他們越來越成功，這個地方也山明水秀，就變成了後來的清境農場一帶。

整個清境農場一帶位處海拔約1700至2000米，如果大家還記得小時候學過的地理科，在山上每升高1000米大概會降低6度，所以大家有興趣上來的話，請入須記得多帶外套、衣服等等。因為你盛夏來也好，晚上的氣溫也是偏涼的，多穿一件外套會好點，這是台灣人會把清境當作夏天避暑的旅遊勝地來看。

而今次的租車，我仍然是選擇格上租車，因為在對比過後，其實大部份主要的出租車公司價錢都差不多，而且格上仍有我希望租用的車款，所以就選擇了。租用的過程大都大同小異，你上網看清楚車款，價格，填好表格，租車公司自然會聯絡你與你商談。不過請留意，有一些優惠只是給本土居民的，我們在香港的朋友屬海外人仕，只能用海外人仕的優惠。詳情待我寫一個台灣租車的介紹。

準時到達取車就好，請不要讓香港人的名聲下降啊。你取車的時候職員會詳細的向你解釋條款，注意事項等等。最後會與你一起檢查車子的外觀，確定一切正常之後，就會簽訂合約，正式刷卡付款，由拿到車匙的一刻，恭喜你，你可以把車子開走了。

我們的三台汽車，豐田wish及yaris。

小惡魔玩轉高雄台中 (台中清境篇2) 國立臺灣美術館

原來在台灣的時間已經過左一半了，果然開心的時間特別快。今日我們的旅程較趕，因為原訂早上去台中公園行下的，但因為昨天沒有去國立臺灣美術館，所以好想今日仍去一次，另外當然係昨晚訂的靚靚餐廳午餐啦。最後就攞車，出發去清境睇羊仔。

一早起來，早餐後就出發去國立臺灣美術館了。由於與酒店有一定距離，所以的士吧。其實如果你係成年人團，而又住近誠品的話，慢慢步行過去是可以的。而我地小惡魔團的目標，當然係享用一下美術館內的兒童遊戲室啦。雖然我地今早的時間不多，甚至有點走馬看花，但以短暫看的感覺，美術館是十分值得參觀的，無論你是否懂得藝術。小朋友除了遊戲室，還有極大的空間、草地等等，你又怎麼會覺得不開心。而另一個我會介紹的，就係兒童繪本區，亦係一個十分值得參觀的地方，所以這兒應該可以一定大細玩一日也不會悶的。

整個美術館佔地面積約有102000平方公尺（含園區雕塑公園），是目前亞洲最大的美術館。我估，你要參觀整個美術館可能要預留超過一日的時間。

小惡魔玩轉高雄台中 (台中清境篇1) 國立自然科學博物館

終於來到台中清境的旅程了，今次比我們以前還要浩蕩，今次我們有三家人一同去清境旅遊，一次過出三架車去呢。今次的台中之旅，留的時間比我們上一次來多，可以參觀更多台中的景點，一些上次來訪時沒有去過的。坦白講，台灣真的每一次來都發起到新內容，新玩意。

今天我們主要的活動就是參觀博物館了，台中有兩個很大型的博物館，一個是國立自然科學博物館，另一個是國立臺灣美術館。這兩個館都是十分大型，而且更有不少合適小朋友玩及參觀的設施，而這些亦是我們在香港不會看得到的，一個可以讓你一家人參觀一整天，而且可以大人小朋友都合玩的地點，真的不容易找得到。

基本上今天的行程是這樣的：
國立自然科學博物館>國立臺灣美術館>晚上任選一商場或夜市

我們一行十八人，七位小朋友十一位大人，在吃完早餐之後，就出發往國立自然科學博物館。我們住的酒店相當近這些地方，所以我們只需要步行過去就可以了。而台中的交通沒有高雄或台北這麼方便，或許待一年後台中捷運通車後會好一點吧。所以，如果一些較遠的景點，還是坐的士吧。

一行多位小朋友，像回幼稚園上學一般，排排隊，其實咁玩一餐佢地都好開心架啦。

小惡魔玩轉高雄台中 (高雄篇3) 壽山動物園、牛老二牛肉麵、吳寶春麥方店

來到留在高雄的最後一日，天氣仍然炎熱，不過我地都決定繼續行程，探訪高雄市的壽山動物園。台灣巿兩個比較大的動物園，一個係台北的木柵動物園，那個比較大，展出的動物亦較多，如果你係第一次去動物園，我相信你必定會滿意。而高雄壽山呢？就比較細，設施亦相對無咁多同好。不過既然咁多小朋友，又係未去過，所以都值得到訪一下。

我地入住位於鹽埕區的酒店，同動物園相隔唔遠，交通都算方便。去壽山動物園主要有兩個方法，一個就係的士，正如我之前講，高雄坐的士亦算平。第二個係坐捷運去到鹽埕埔站4號出口，至五福四路華南銀行前搭乘56號壽山動物園專線公車。不過平日就要一小時一班，假日先會15-20分鐘一班。再唔係坐219號公車都可以。帶住咁多小朋友，我地當然的士啦！係酒店check out，留低大件行李，出發。
壽山動物園來園交通

到達動物園，當然係買票啦。台灣大部份設施六歲以下都免費，所以剩係買大人就可以。而票價呢？只係新台幣40元，真係平到你唔信。不過記住，台灣大部份的設施都係星期一公休的，出發前請留意一下啦。
壽山動物園參觀票價

小惡魔玩轉高雄台中 (高雄篇2) 國立科學工藝博物館

第二日旅程，亦係我地係高雄的主要活動日子，因為今日可以有一整日玩！係酒店食個早餐，我地就出發去今日旅程的第一站：國立科學工藝博物館。

如果你有孩子的話，我極度建議你來高雄要來這先玩一下。因為科工館佔地十分大，基本上香港的科學館同佢無得比，再加上甚麼都新鮮的情況下，其實係到玩一日絕對唔係問題。帶小朋友去旅行為乜？大家都係為左一家人開開心心，輕鬆一下。你可以帶小朋友去環球影城玩足一日，亦都可以帶佢去試下科學體驗一日，分別就只在於你怎樣選擇！

第二日的高雄之旅，仍然係繼續落雨，而且仲係突然大雨，突然放晴，真係俾佢玩死。不過好彩的係，科工館係完全室內的，仲要有冷氣，所以完全無問題。我地選擇左先坐捷運到高雄車站，再坐的士前往的方法。其實由酒店坐的士去都唔係十分貴，不過去到外地，當然要俾小朋友體驗下乘坐其他交通工具。最魔鬼既係，係高雄車站有台鐵本鋪的櫃位，身為火車迷的小朋友當然要去拜訪一下。最後當然買左戰利品啦…

法國TGV高速列車（台幣360元)

如果你想簡單一點，其實可以由酒店直接坐的士去科工館的，係高雄市內應該唔會過二百元臺幣，一家人坐都算可接受。因為科工館的位置其實幾唔近捷運的，就算你去到高雄車站，其實仍要轉乘巴士，如果咁計法，不如係酒店直接坐的士好一點了，節省時間，亦舒適，畢竟係去旅行，舒適一點都可以啦。

有關科工館的參觀資訊、交通資料等

小小地球人27期

新一期小小地球人又送到啦！

由於係寄航空掛號的關係，郵差叔叔係親自拿上門的。所以不用擔心係信箱俾人偷，或者會摺疊起來。

齊來動手做信箱

小朋友升上K2了，學校第一份功課是希望他們每人做一個屬於自己的信箱，放在班房的牆上，讓不同的小朋友可以寄信或互相留言。所以爸爸便和他一起製作自己的信箱。

小小地球人送到了！

不經不覺間，訂閱了小小地球人月刊已經個多月，小朋友都已經差不多睇完兩本了。因為睇一本都要一段時間，又要消化，又可能做下手工，所以都唔係可以好快睇得完的。

而個多月過後，我最關心的事件就到啦。究竟係咪可以順利係台灣送到香港呢？

而答案係得既！

係我去完台灣回港之後，就發現已經收到了新一期的刊物了！

因為係用掛號的型式，所以郵差係直送到家中的。而用掛號的原因，係因為出版社都擔心會寄失呢。

煮好餸 千層豬柳芝士卷

希望能簡單的介紹一些不用花太多時間準備，而又好味的餸菜俾大家。好讓各位父母可以多一點時間與你的子女一同玩樂。今次我準備左小朋友十分喜歡食的芝士做其中一樣配料，加上營養豐富的露筍，意大利麵，日式蛋卷，成為了今次豐富又有營養的午餐。

原來我學的食譜之中，千層豬柳芝士卷係炸的，我就簡化左個程序，用左煎的方法去處理。除了令整個煮食過程精簡了之外，亦讓食物使用的油較少，應該會較為健康。始終多吃熱氣食物對身體不好吧！尤其係年紀還小的小朋友，健康均衡的飲食先係最合適佢地。

千層豬柳芝士卷

煮好餸 小黃瓜雞蛋三文治

又係炎炎夏日的日子，成日煮飯、麵之類大人食左都覺得悶。所以今日為小朋友預備左一點不同的午餐，希望刺激一下食慾。今次又係預備一些好簡單的食譜，大家可以係屋企簡單快速的為你的孩子準備一下。

而且大家只要早一晚整定個沙律，帶返公司做午餐一樣可以，經濟實惠過你落街買份三文治。所以今次的介紹可以話係大人細路都啱食的。

今日的菜單係小黃瓜雞蛋三文治配冰凍愛文芒果
影相既時候已經俾小朋友食左一件了

小小地球人裡面係怎樣的呢？

之前提過的小小地球人兒童月刊，係到手之後我地正式開始左閱讀的工程。不過內容十分豐富的關係，要睇陪同小朋友睇完一本都需要一點時間。因為內容有機會互相緊扣，係閱讀的過程中，小朋友需要思考，會發問問題。而亦都十分考驗爸爸媽媽自身的知識，因為當小朋友問到一些大人都不懂的內容時，我地就需要陪佢一齊去搵答案。而這一個行動，亦係我十分希望兒子多讀書的原因。對於小小地球人，我地一家人就讚不絕口，究竟佢有幾好呢？我選取了其中一本去介紹一下。

這本月刊一共會出版36期，包括不同的主題，內容亦會環繞這36個主題延展不同的內容。生活科學、自然生態、生活健康等等。當然，要一本書能對每一個範疇仔細的教授的話，那本書應該十分之厚。所以基本上是按不同的題材去延展，不同的題材的延展內容也會有不同。

今次我就選擇了其中一個主題來介紹一下。

多了一元怎麼辦

小朋友：爸爸，你今星期未給我零用錢呢！
父：係喎，今日星期幾呀？
小朋友：今日星期二了。
父：那我現給你好吧。

於是我給了他一個兩元，兩個一元硬幣。

小朋友：爸爸，這兒只有四元。
父：係喎，那我再給你一個兩元吧。
小朋友：爸爸，現在有六元呀。
父：係喎，那怎麼辦好呢？我只是給你五元。

從小培養理財習慣

香港有一個都市傳說，而傳說係咁的，「養一個小孩子要四百萬元」，包括供書教學，琴棋書畫，仲要將來供埋佢去外國讀書。更加利害的是這個傳說近來已經增加至八百六十萬元。如果你生兩個，那恭喜你，你需要有一千七百二十萬元去供養兩名子女長大成人。對於這些天文數字，你可能一笑置之，亦可能用盡方法希望可以為你的孩子搵到這畢錢。不過無論怎樣也好，這都是我們成年人的玩意，作為父母對子女的一份心意。

而我這個人比較喜歡凡事讓子女親力親為，無論我能否為他預備一畢可觀的儲備，但我也希望他能自己學懂理財，儲蓄的概念。相信凡為人父母者，今天的你也可能曾對自己抱怨，為可不早一點懂得投資，懂得理財，那可能今天已經計劃了四十歲退休，享天倫之樂。所以我希望我的子女可以早一點接觸到金錢的概念，接觸到儲蓄的簡單概念，為他的未來作一定準備。

其實計劃暫時係好簡單的，我只係答應了他以下數個條件：

1. 我以後不會再主動買任何的玩具給他(盡量吧！有時係買玩具係爸爸自身的購買慾作怪。笑)
2. 我每星期一會給他五元作為零用錢
3. 他可以自行決定零用錢的用法，無論是買糖果或是買玩具
4. 如果他能儲蓄到一百元，到他買東西時會我再給他一百元
5. 零用錢我不一定會記得給他，請他自行準時問我拿取

就只是這五樣簡單的條件，就開始了小朋友的零用錢之路。可能你會問，他年紀這麼小，有機會運用零用錢嗎？年紀這麼小，懂得甚麼是錢嗎？而我的答案，正正就是因為他年紀小，所以我打算開始慢慢的教育他金錢的概念，管理金錢的法則。而不會因為他年紀小，而不讓他嘗試不同的事情。

每星期我也會與他一起數數錢箱中有多少錢，除了儲蓄之外，這亦是一個教育金錢概念，甚至係學習加減數的好時間。去到今天，他已經可以自己計算到錢箱之中有多少錢，認識到不同錢幣的樣式。當然，暫時仍需要父母的輔助，但我相信有一天他會能自己去處理這些問題的。暫時的成績是他已經成功儲蓄到一百元，並買了自己第一盒的積木呢！

當中也有不同的階段與教育的題材，可以供我們好好的介入與教育的。如果你的孩子經過樓下報攤、文具店，每次也要求買不同的小玩具，你會怎樣處理？經過大型玩具店，你又會怎樣處理？孩子堅持要把錢用在一些你認為沒有用的事項上，你又會怎處理？

這計劃的進度如何，我會慢慢的與大家一同分享。

親子的棋盤時間

大家細個的時候有無玩過康樂棋呢？唔係有棍打個種，而係有張紙，要輪流擲骰那一種。依家已經差不多失傳了，都無乜地方有得賣。而你又有無諗過，其實玩康樂棋係可以與你的子女學習數學呢？

以前的康樂棋可以1-100，依家的只可以1-70。或者大家可以自行選購合適你使用的。

臺灣月刊小小地球人

今年書展剛剛過去，我都有按傳統入去行下，看看有沒有甚麼合適的書籍俾自己同小朋友。不是入到去發現，最吸引我們的仍是臺灣出版的書籍，兒童繪本。而香港的出版社仍然係十年不變，中英對照的迪士尼故事，大量兒童作業，製作簡陋的童書。究竟係市場需要，還是香港真的容不下一些優質的童書？

其實在童書的選擇中，我只有以下的要求：

1. 有教育意義
2. 小朋友會一睇再睇的
3. 如果可以畫面精美則最好

而當你接觸過臺灣的童書之後，香港的真係無咁好，最少我唔想個仔一定要睇到有超人、四驅車的漫畫。而係土臺灣，無論係臺灣本土出版的，還是翻譯外國的，都有豐富選擇，既然選擇咁豐富，而且要買臺灣的東西又咁易，我為甚麼還要買香港的？今次我地睇中左一本月刊雜誌，叫做「小小地球人」。雜誌總共計劃出36期，每期有不同的主題，例如「電」、「牛奶」、「木」等等，內容則再按主題延伸下去。不止是單一主題，而是由主題伸展到不同相關的項目，有點像運用腦震盪的方法去思考。而且製作精美，有圖片，文字亦淺白易明，我相信小朋友可以由伴讀到自己能閱讀都會繼續翻閱。

合共36個不同的主題，每個主題會在內容中用不同的角度延展開去。

蒜鹽煎三文魚伴露筍

不知道大家有沒有為孩子的午餐煩惱呢？我就有啦。而當我有時間係屋企為孩子預備午餐的時候，總希望煮一些營養價值高，又健康的飯餸予孩子。雖然我唔係甚麼大廚，不過希望可以與大家一同分享一下我為孩子預備的食物，互相交流一下。

今次煮的食飯非常簡單，可以配飯，配意粉或者配麵包食用都可以。而且露筍和三文魚都係營養價值高的食物，相信孩子食用之後亦能對他們的身體有益。至於好唔好食？我每次煮，小朋友都會食晒，同埋食埋碗飯，應該好味掛。

蒜鹽煎三文魚露筍

智樂社區大自然遊戲 將軍澳版

大家之前有無去過由智樂兒童遊樂協會舉辦的兒童遊戲日呢？他們每次都會帶充滿歡樂以及創意的遊戲與大小朋友！
今個星期大家又有機會去玩啦！地點係好多小朋友住的將軍澳區，住呢區的家長要留意一下啦！
如果你星期日未有地方去，不妨計畫一下。

公園，草地，歡笑！
我地星期日見啦！
記得帶備飲用水俾你的小朋友呀！

自己的孩子自己救

近日香港發生了很多事情，無論你是支持甚麼的，相信甚麼的人，可能你也覺得香港已經變了。變得陌生，你不再熟悉香港。

各位爸爸媽媽，在你們為你的孩子安排興趣班，安排各項學習活動的時候，你又怎樣安排他們的未來？你又有為他們生存的環境努力過嗎？

我相信大家都是努力讀書，努力工作去給予你的孩子最好的。但人活久了，你應該也知道努力並不是必然，一個優良的環境也是必需的。你又為你孩子的環境作了甚麼？

一個優良的環境不止是千多呎的大屋，千多呎的花園，讀名校，身懷十八般武藝。更包括健全的體魄，優質的心靈，富正義感的良知。

今天的香港變了，你可以留甚麼給你的子女呢？只是花你數分鐘，動手吧。

無論你有否下一代，你是否關心政治，但我想你最少關心自己吧。

人生本來就有很多事是徒勞無功的，但不做的事就永遠不會成功。

將軍澳南海濱長廊 單車徑

今天小朋友決定不去游水，因為貌似對上一次游泳時被水嚇怕了，不過這是另一個問題。加上昨天爸爸在鴨寮街買了新的電燈安裝在他的單車上，所以今天我們決定去踏單車。因為我們有自己的單車，所以我們很方便的下樓便可以開始旅程。香港是很特別的，只能在一些新的市鎮政府才會規劃單車徑，不知道目的是供市民運動而用？還是代步而用。想當年我們年青時大部份人都會到沙田、大埔等地去租單車玩，不過今天可以試試改變陣地，將軍澳也是一個不錯的選擇。

隨著將軍澳的新公屋怡明邨入伙，附近的社區配套也慢慢的完工對外開放，最新的應該是我們今次漫遊的「將軍澳海濱公園」。 而加上大半年前開放由將軍澳站連接日出康城的單車徑，整個環繞海邊的路段便稱作「將軍澳南海濱長廊」。

全副武裝的小朋友和他的愛車，三歲時因為沒有做好安全操施，小朋友曾經由單車上跌下以至骨折，家長們記得要安全地踏單車呀！所以我們現在每次都會全副武裝才出車。

參與綠腳丫活動 BB街巿購物大挑戰讀書會

剛剛過去的星期日很特別，我們參加了一個很特別的活動。我們去與小朋友去了大埔廣福邨的街市去購物。可能你會問，去購物有甚麼特別？的確，一般去購物並沒有甚麼特別，甚麼一些社區中心也可能有舉辦，甚麼提升兒童自信、溝通能力訓練等。但如果主題是去了解傳統社區的人和物，關心舊式社區小店的生存，遊玩一些我們父母輩小時候的遊樂場，爬兩層樓高的滑梯呢？香港人甚麼也急速，小朋友的成長也需要急速，還記得我們小時候是怎樣成長的嗎？還記得每天在遊戲場跑跳爬的日子嗎？

今次活動舉辦的組織叫「綠腳丫親子讀書會」，是哈比學堂的新嘗試。詳細留待之後介紹，或者可以上佢地網頁，facebook了解多一點。如果你係喜歡與孩子一同閱讀繪本的父母，你就更加要了解一下。今次我地參加的「BB街巿購物大挑戰讀書會」，內容介紹係咁的：

1. 傳統涼茶鋪美味涼茶競選
2. BB街巿購物大挑戰
3. 舊式辦館導賞及待用食物箱設計、繪畫
4. 玩轉懷舊遊樂場

負責今日活動的係兩位義工姐姐，我地準時去到廣福邨，食個午餐就去集合了。人數唔多，大概有六個家庭，六七位小朋友，大家都大概係三至五歲。

一開始當然係講故事啦！講左一本繪本，名叫「媽媽買綠豆」，內容係關於小朋友與媽媽一同去市場購物的經歷，切合今天的主題內容。大家都好留心聽呢。
媽媽，買綠豆

搵啖食 大埔 K Square

話說星期日參加完綠腳丫活動，時間已經差不多係晚飯時候。一心入到大埔，曾經係大埔地膽既爸爸緊係想係大埔食返餐好既。原本想試下一間專吃蕃茄為主的店鋪，可惜我們遲了一點，已經要排隊了。為了可以快點為疲倦的身軀補充一下，就到了友人介紹新開的店鋪一試。

去到的時候晚市開始不久，餐廳仍然有不少未入座的位置，不過聽店員說大部份已經訂了座，可能我們遲點也未必有位。餐廳共有兩層，大概有三十多個座位。可能我們去的時候人不多，所以環境不錯，不過枱與枱之間其實幾近的。可以想像得到全店滿座的時候，你有機會要大聲一點才可以談天，不過整體而言，環境是不錯的。像這類小型的店鋪，係香港要生存枱又怎可以放得有空間。何況有收得再貴的，也有把枱放得更逼的，所以我們還是把注意力放回食物上吧。

K Square主打西式食品，例如安格斯牛扒、烤全雞、各種意大利粉、薄餅等等。價錢我覺得在大埔來說算做貴價的，不過你去返市區，應該就只算中等價錢。暫時仍是新營業的關係，餐廳免加一，不過不知道會優惠到何時。而餐牌中的食品，加$35(如果我無記錯)就可以跟湯及飲品一杯，以他們湯的質素來說，是值得的。不過由於剛吃時太肚餓了，忘記了影相。

我們共點了，四樣食物。白汁波菜鮮蝦意粉、芝心漢堡、夏威夷薄餅及芝士焗薯條，再加了一個餐，最後埋單四百多元。食物的質素不錯，周打海鮮湯材料份量多，味道亦足夠。其中芝士焗薯條及白汁波菜鮮蝦意粉味道最佳，連一向食量不多的小朋友都竟然食了大半個意粉！都真係第一次。

坑口體育館 兒童遊戲室

又係去唔同遊戲室既時候啦！近排單車館遊戲室新開，小朋友差不多一星期去三四次。今日天氣炎熱，所以諗住不如去遊戲室玩啦，最少有冷氣，唔駛成身汗。怎知道小朋友竟然話唔想去單車館，要去其他遊戲室。我就提議不如去坑口體育館啦，都有好耐無去過了，上一次去的時候剛剛新開，那時候小朋友才剛剛兩歲。所以促成了今次坑口體育館遊戲室之旅。

坑口遊戲室交通其實唔算方便，最近的地鐵站當然係坑口站。如果你有興趣來的話，你可以坐港鐵到坑口站，再步行過來。亦有一些巴士小巴係經過附近的，不過基本上你唔係住將軍澳的話，要來玩其實唔就腳的。

去到遊戲室樓下，我問下小朋友記唔記得自己曾經來過玩。佢竟然可以答我記得，仲話自己個時兩歲，好耐無來過咁話。究竟佢係真記得？還是怎樣呢？所以小朋友的記憶力真係唔好睇小，大家答應左你小朋友的野記得做啦！哈哈。

遊戲室處於體育館的1樓，入到去坐電梯或者行一層就到。門口有嬰兒車的停泊處，家長可以自駕再泊車係到。由於無帶相機的關係，相片係手機質素，煩請大家忍耐一下。

小惡魔玩轉高雄台中 (高雄篇1) 駁2藝術特區

講起上來，今次的旅程都幾突然。原本係諗住兩公婆自己去玩的，怎知道剛好遇到阿仔的同學仔約左去台灣，對於熱愛台灣的我，可以有機會同一班阿仔的同學去旅行，立即覺得係一樣好玩同好有挑戰的事情，所以就決定了參加逃學團。

我地總共有六個家庭參加，由買機票到出發，大概準備左三個月。其實都唔多野要準備，都係買機票、訂酒店、民宿，同埋其中一日去境的自駕要訂車。我地出來開左一次會就係咁多，其他事項都係wahtsapp攪掂晒。而我地頭兩日係高雄的有4個家庭，而有2個家庭係台中加入一齊玩到尾。

七日的行程，我地大約係準備咁玩的：
第一日：香港>高雄>旗津半島>晚上任選一商場或夜市
第二日：國立科學工藝博物館>兒童美術館>晚上任選一商場或夜市
第三日：壽山動物園>高鐵台中>酒店附近晚餐
第四日：國立自然科學博物館>國立臺灣美術館>晚上任選一商場或夜市
第五日：台中公園>自駕埔里午餐>清境民宿>小瑞士花園>清境晚餐
第六日：清清草原>羊咩咩脫衣秀>步步高昇步道>小瑞士花園>清境午餐>自駕回台中> 晚上任選一商場或夜市
第七日：台中買手信(太陽餅街)>清泉崗機場>香港

好似好完美吧！如果只係一家人去，或者兩三個小朋友一六去，其實應該無特別問題的。但係今次旅程之中，我地人多，每一個小朋友的生活習慣有不同，加上天氣變化、身體情況，原來最後都唔係可以諗得咁簡單。所以去到最後，我地的旅程係做左調整的。其實都係我地預期之內，大家係出發前已經有共識，就係會因應到時的情況而有所調動。加上今次大家的目標都係俾小朋友去下玩，簡單旅行，所以去少一兩個景點又無所謂，重要的係小朋友開心愉快就係了。

其實好早機，我地個朝係0650係機場集合，checkin後先一齊食早餐。好在依家機場開左好多餐廳，唔會無野好食。例行工事，當然係睇下飛機先啦！同學仔媽媽好好，同一班小朋友一路睇飛機，一路串英文字認航空公司，原來咁都可以學英文，真係學到野。

出發了！飛機餐唔影啦！都係個d野啦。不過小朋友看來仍未訓醒，好眼訓咁喎。

兒子不肯出席興趣班

大家有無試過遇到小朋友唔想去興趣班扭計呢？平時大家又係怎樣處理的呢？我地剛剛就試左一次。諗住與大家分享一下處理的方法，互相交流一下。

話說剛剛去完旅行，一團六個小朋友都各自有不同的旅行後遺症。例如我家小朋友就仍然十分疲累，返學無心機，連行路都唔肯。去到今日星期三，體能終於回復一點，無咁疲累，不過個心仍然未返香港。話說每個星期三小朋友都要回校上興趣班，一般既做法係放學回家吃飯訓一個多小時，起身再出去學校的。怎知識今日小朋友起身，換好衣服之後唔肯出去，不斷喊，其理由係興趣班那兒唔好玩。

坦白講，已經換好晒衫，準備好晒的情況下，其實係可以強行拖佢出門口，我亦好相信送左到學校佢就會乖乖的上堂了。不過我相信係小朋友的成長階段中，這樣的事情必定會一而再再而三的出現，如何去減少發生可能性，或者令小朋友明白到他自身的責任，那才是最重要的。

當時我做左以下的處理：

1. 先平伏小朋友情緒，情緒到的時候任何理由也講不通的，小朋友如是，大人也如是
2. 慢慢引導小朋友講出不想上興趣班的原因
3. 要求小朋友致電向老師請假
4. 和他一起重溫上興趣班的內容與原因
5. 要他為著自己沒有上興趣班而負責任

而當中我認為最重要的是讓小朋友明白到上興趣班與否，是其責任，不是成年人的需要。

六小惡魔反轉台灣逃學團(預告篇)

話說今時今日的小朋友真係十分幸福，想當年爸爸我都係出來工作才第一次去旅行。今時今日小朋友已經去過幾次旅行，而係剛剛過去的一星期，我地一家人與小朋友的同學仔一齊去旅行。你無睇錯，係同埋佢的同學仔幾家人去旅行，所以話現今的小朋友幾幸福呢…

而且今次我地亦挑戰難度，由高雄玩到台中，總共18人，11大人7小朋友，諗返去都覺我我地好利害！

行程：
第一日：高雄落機，駁二藝術特區，三多商圈大遠百貨誠品
第二日：高雄國立科學工藝博物館
第三日：高雄市壽山動物園、牛老二牛肉麵館、吳寶春麥方店、高鐵直逹台中
第四日：國立自然科學博物館、廣三sogo
第五日：國立台灣美術館兒童遊戲室、南瓜屋紐澳良義大利餐館-魔女露露的廚房、自駕往清境、住清境之星，食清境魯媽媽雲南擺夷料理
第六日：清清草原羊仔show，慢遊步道，自駕回台中，超神的百里香牛肉麵
第七日：手信日，回香港

這亦係我上星期完全無寫blog的原因，與六位四歲的小朋友一齊旅行，簡直係攞你半條人命。不過整個過程就十分開心，回味無窮。今次我希望盡量簡短，只係介紹一下我地所行一些值得推介俾各位帶小朋友去玩的景點，同埋今次一行咁多人係安排上，實際運作上的一些分享。因為其實我地仲有一次京阪神的遊記未寫呢！爸爸要加油！

小惡魔玩轉高雄台中 (台中清境篇4) 百里香牛肉麵

小惡魔玩轉高雄台中 (台中清境篇3) 清境之星民宿、清境魯媽媽雲南擺夷料理、清清草原、羊咩咩脫衣秀

小惡魔玩轉高雄台中 (台中清境篇2) 國立臺灣美術館

小惡魔玩轉高雄台中 (台中清境篇1) 國立自然科學博物館

小惡魔玩轉高雄台中 (高雄篇3) 壽山動物園、牛老二牛肉麵、吳寶春麥方店

小惡魔玩轉高雄台中 (高雄篇2) 國立科學工藝博物館

小惡魔玩轉高雄台中 (高雄篇1) 駁2藝術特區

閱讀的好處

我相信自小培養閱讀的興趣，是建立小朋友良好品格與知識的關鍵。其實自小朋友還是嬰孩的時候，我們已經開始會讀書給他聽，目的除了和一般家長一樣，希望他盡早接觸知識，不要落後其他小朋友外，還因為我們都是喜歡閱讀的人。

還記得我媽媽在我小學中學的時候，每個星期都帶我到圖書館去看書、借書，而我亦因此愛上了閱讀。我小時候甚麼書也看，最愛看的是和自然科學有關的書籍，曾經還有成為科學家的夢想。當然最後做不到，不過那是另一個故事。到了中學，我沈醉於武俠小說、衛斯理的世界當中。回想這兩個時期的閱讀經歷，做就了我成為了一個「萬事通」的特質，雖然未必每一樣東西都是專家，但在不斷閱讀不同書籍的過程中，我亦不斷的吸收了各種常識，這對於我日後的生活上，尤其是在探求知識的習慣上提供了不少的培養。

而且你希望孩子是在電視機、電子產品的包圍下成長？還是在書本的懷抱中成長？你如何去培育你的孩子，他就會成為一個怎樣的人。加上與孩子一同讀繪本、圖書，根本就是最便宜，人人皆可的親子活動。如果你認為買書本的價錢十分驚人，而且家中沒有位置擺放？那去公共圖書館吧！不用錢的！

蒲崗村道體育館 兒童遊戲室

由今個月開始，小朋友變左逢星期三下午回學校上興趣班，原本是星期一上的，但可能星期日通常都玩得太累了，很多時候星期一午睡後都不願起床。所以我們把課堂轉到星期三下午，看看會否好一點。到放學時已經是下午六時多，平時我們會回家準備吃晚飯的。但由於今天媽媽約了人吃飯，祖父母又有事情不一起晚飯，所以爸爸就和小朋友決定兩個人去撐枱腳。而在晚飯前，我們去了附近的遊戲室玩一會。

學校在鑽石山，所以我們選擇去了就近的蒲崗村道體育館兒童遊戲室。這個遊戲室我們都是第一次來，所以一去到竟然發現佢係有晚休時間的！原來係17:45那一場之後係會關門的，直到19:00先再開放，我估這一小時係俾管理既工作人員食飯吧。最後我地去睇下人打壁球，行下體育館，終於等到七點。可能係食飯時間，人唔多，加埋大約都係十個人，不過就有一個特別之處，來這兒玩的小朋友好多都係自己來的，反而有家長帶既先係少數。

地方不大，根據康文署網頁，這遊戲室有130平方米。

整個地面都係軟的，你可以放心小朋友係到跑動。不過遊戲室內的物品不多，我感覺上可以玩的物品都比較偏用細個一點的小朋友使用。不過小朋友當然唔係咁諗啦，一開放佢就二話不說衝左入去跑跑跑了…

台灣直送書籍方法

大家有無試過飛台灣時買大量書籍回港，攪到行李超重呢？我相信大家都有類似的經驗，因為係台灣買書真係平過香港，而且仲要係繁體字的書籍。所以每一次我地去台灣，都會行下書店，買下書，運一批批的親子書籍返香港。而且台灣的書店很多時候都會有折扣，如果你係大書店買，扣埋稅差不多可以係香港的六成書價，難免咁多香港人都會係台灣買書。

這是我地其中一次去台灣的盛況。

201213 墾丁台北跨年七天之旅 Day6 (貓空纜車、信義誠品旗艦店)

好了，201213年去的旅行，到了2014年才完成寫作，真的太慢了。所以我決定把最後兩日一次過完成了，再開始另一個旅行的記錄。(其實最後兩日沒甚麼好寫…)

在台灣的第六日，原定我們今天會帶子朋友去乘坐貓空纜車，下午再到木柵動物園去的，但天公不做美，由一大早就開始下著大雨。但我們也試著出發，希望坐過貓空纜車後，天氣會放晴吧。

其實去貓空與及木柵最好的方法是安排在同一天，因為兩個景點是在同一個車站下車。坐捷運棕線(文山線)去到總站就是動物園站，下車後按指示牌就可以找到這兩個景點。我個人而言認為帶著小朋友的話，木柵動動園是台北必到的景點之一，因為這個動物園佔地十分大，接近二千萬平方呎，有著457種動物，相信不是很多地方都有這樣大面積而又物種豐富的動物園讓小朋友接觸動物的。

來往物園站的文山線為無人駕駛單軌列車，相信對小朋友來講都係另一種體驗。

取自網絡：http://blair-bus.blogspot.hk/2010/08/blog-post.html

香港單車館及公園 (公園篇)

話說上回提到於2014年落成的香港單車館，亦介簡介了單車館的設施，介紹了適合帶小朋友去玩的兒童遊戲室。有興趣了解單車館及兒童遊戲室的朋友可以按這連結。
香港單車館及公園 (兒童遊戲室篇)

今次我們會再介紹香港單車館另一個重要的部份，亦係我個人認為最重要的部份，因為內裏的設施全部都係唔駛錢的，行入去就可以享用。而這部份就係「香港單車館公園」。

「香港單車館公園」係極新的，因為佢係四月三十日才正式對外開放，則係話係我寫這篇文章的時候，佢只係第三日開放。所以裏面所有設施都極新，新到有一D係未整好的。你無睇錯，係未整好，不過係佢開放的第一日，我立即同小朋友去試玩一下新公園，等我地帶大家去先睹為快啦！

溫馨提示俾大家，可能因為新開放，所以公園係有蚊叮蟲咬的機會。大家吃住做好防蚊叮蟲咬的預防措施，才好享用公園的設施及環境。

又係俾個地圖大家睇下先：

公園那為兩部份，圖中所見中央草坪周邊係廿四小時開放的，而兒童遊樂設施亦係呢部份內。上面紅線後的部份，則開放至晚上十點，大家要留意一下。係有限開放時間的設施內，有一個好大的極限運動場地，而且仲係有看台的，不難想像將來這兒會有比賽舉行，當日所見全部青年人都係踩板的。有一個小型攀石設施、有一個小型表演場地、一條緩跑徑，以及一個俾人玩遙控船的水池。

香港單車館及公園 (兒童遊戲室篇) 7/5/2014 更新

住係將軍澳其實對小朋友來講係十分唔錯的，因為公園十分之多，亦擁有很多的綠化土地，無論是希望有充足的康樂設施去發展身體素質，還是有大片的草也去欣賞郊野都極之方便。今次希望介紹一個剛剛開幕的康樂設施俾咁多位，就係香港單車館啦！

睇個名唔好似為佢只係踩單車，訓練同埋比賽用途，其實整個場館除左單車運動的用途外，仲有好多不同的運動設施在內。例如健身室、乒乓球室，還有最受大家歡迎的羽毛球場、籃球場等，整個場館其實係一間大家平時認識的室內體育館一樣的。

圖片取自康樂及文化事務署網頁：http://www.lcsd.gov.hk/lsb/photo/SK/hkv_4.jpg

係咪好大呢？這兒只係主場館，仲未睇到我剛才講的其他地方。不過我當然唔係想介紹佢有乜野康樂設施啦！我最想介紹俾一眾家長的係兩個好正的地方。

就係單車館內的兒童遊戲室，同埋單車館隔離既單車館公園。這兩個設施都係新鮮滾熱辣啱啱開放的。兒童遊戲係今年四月中先開放，而單車館公園更加係四月三十號才剛剛對外開放。

201213 墾丁台北跨年七天之旅 Day5 (臺北市立兒童育樂中心)

今日的目的地係位於臺北市圓山區的「臺北市立兒童育樂中心」，相信這一個景點對於香港人來說比較陌生，因為如果你唔係有小朋友的話你係唔會來的。相信你淨係睇個名會以為這兒是一間中心，類似兒童遊戲室之類。但係你咁諗就錯啦！其實這兒是一個佷大的綜合兒童遊樂場，內類有適會兒童玩的機動遊戲、康樂設施、一些中國民間傳統的手藝、一間像科學館的展館，絕對係可以與你的孩子在這兒玩足一日的。而且位置類近士林夜市，坐一個捷運站就到了，玩完玩夠之後，你仲可以一家大細去行下夜市，大人細路都可以玩足一日。

一早出發，小朋友好想與酒店傍咖啡店的公仔影相。

「臺北市立兒童育樂中心」交通十分方便，只要乘坐捷運到達圓山站，步行五分鐘就可以到達了。

圖片取自「臺北市立兒童育樂中心」網頁。

201213 墾丁台北跨年七天之旅 Day4 (平溪線十分一日遊)

來到旅程的第四日，我地亦開始台北既旅程。
由於小朋友係鐵路迷的關係，我地亦安排左需要坐鐵路的旅程，等佢可以睇下唔同地方的火車鐵路係點樣的。
不過係我地計劃旅程既時候，原來諗少左一樣事情，亦令到第四日的旅程增加左難度同變數，好在最後都順利完成，至於係乜野，留返最後先講。

今日的目的地係十分、菁桐，睇下舊火車站同放天燈。其實今日的路線我地兩個大人曾經自己來台灣時已經試過，而且亦無乜特別難度，我地原本計劃一早去到台北車站買車票，先前往瑞芳車站，再轉平溪線往十分菁桐。但係當我地去到台北車站的時候，嘩！乜咁多人的，我地原朲打算係台北買「平溪線一日週遊卷」的，但真係太多人了，所以決定到了瑞芳先買。如果大家有興趣遊十分、菁桐或者去侯硐睇貓的，記住要買「平溪線一日週遊卷」，因為只係52元台幣，你可以係整條平溪線上上落落而唔需要再買票，對於一日想去晒咁多個地方的人來講，係好扺的。(其實大部份人都係一日去晒咁多個地方)

我知道買票的地方有兩個，一個係台北車站臺鐵的售票櫃位，另一個係瑞芳車站內購買就可以，其實邊一度都無乜分別，反而係視乎你自己旅程的安排。因為帶住小朋友，有時真係唔可以有咁多時間自己走圍走，如果順路經過台北車站，預先買早一日的車票亦係一件好事。

臺鐵一日週遊劵的資料

 指定動作必然係同列車影相啦~

油塘炮台山調景嶺輕鬆遠足路線

星期日，天清氣朗，喜歡野外活動的我們，決定帶個仔去試下行山。其實郊外佢去過幾次，不過都係行個圈，輕輕鬆鬆的。今次準備一條對小朋友來說有點挑戰性的路程，不過結果係發現，小朋友係你估佢唔到的，全部自己行，順利扺達終點。

今次的路段係衛奕信徑第三段的其中一部份，當中上高落低不多，而且風景怡人，途中還可以去二戰時期英軍下的防衛堡壘，不過今次係第一次郊遊，所以無去到，下次再去時補返個遊記。

全程：約1.5小時(視乎逗留時間)
難度：1星(以成人計算)
地圖：由GOOGLE提供，做個預算好，不可作準。


開始時車到油塘站，跟著路牌向將軍澳墳場方向進發就可以。而第一個挑戰就係長命斜，其實難道就唔大，慢慢行就可以上到馬路與衛奕信徑的路交位置，就可以開始前進往炮台山啦！

長命斜

201213 墾丁台北跨年七天之旅 Day3 (夜宿海生館DAY2、台北市)

嘩~
對上一次講呢個旅行已經係一年前，因為太忙的關係，連打blog的時間都無，有時間都用左來休息同埋去玩。希望之後可以繼續update下可以同小朋友去的地方與大家分享一下。

去到旅程的第三日，我地亦係時候離開墾丁，向台北出發。

一早係海底隧道起身之後，海生館方面亦提供早餐，只要攞住早餐卷就可以食。有早餐同埋西餐選擇，不過其實都係一d好普通的食物來，叫做填飽個肚有力繼續行程囉。

大帽山賞霧、農場鮮奶有限公司一日遊

成日同小朋友講天氣，好天落雨見得多，乜野係大霧呢？見到今日天氣麻麻，多雲有霧，所以決定去大帽山深入雲海/霧海等小朋友受一下乜野叫大霧。
大帽山郊野公園其實唔難去，你可以係荃灣地鐵站或西鐵站坐51號巴士，去到荃錦凹落車就可以。而51號的另一邊總站係錦上路，大家可以係元朗個邊入都可以。

去到落車搵扶輪公園，就可以去到扶輪公園的郊遊地點。呢個地方可以野餐、燒烤、仲有數條不同難度的行山徑會路經或係到出發。例如難度極適合小朋友體驗行山的「大帽山家樂徑」等等，詳情可以參考下漁農自然護理處的網頁。

大帽山家樂徑

大帽山郊野公園

當日真係幾大霧，小朋友見到十分開心，仲話自己係雲裏面，要試下捉住D雲，呢個時候當然係教育下一代的時候啦，講下天氣氣象等知識。

2014.02.24 遠足體驗263

希望兒子能培養出遠足，欣賞大自然的良好習慣。 有時間，故就與他一起登山，找一個小山頂來讓他挑戰一下。順道建立一下成功感，希望他能愛上登山活動。

其實也沒有甚麼準備，就只是剛好有一天放假，拿起背囊及封了塵的裝備就出發了。地點選擇了西貢北潭凹附近的牛湖墩營地，那兒交通方便，亦鄰近麥理浩徑，平日亦較安全。
我們自駕到達北潭涌後，就轉乘94號巴士到北潭凹，其實只是坐三個站。如果由西貢出發，亦係一樣坐94號巴士，到達北潭凹站落車。
唔駛擔心，d相係濛的，因為爸爸唔記得左相機用左呢個效果。

出發了，跟著麥徑向赤徑的方向前進。

途中向小朋友講解一下花草樹木，亦解釋一下標距柱的用途，有意用可以怎樣求助等等，以減輕他的擔心。途中小朋友不斷問我點解咁多樹，d樹咁高，就俾左機會我解釋郊外的環境，對生態的用途點解要保護大自然等。