2014.02.24 遠足體驗263

希望兒子能培養出遠足，欣賞大自然的良好習慣。 有時間，故就與他一起登山，找一個小山頂來讓他挑戰一下。順道建立一下成功感，希望他能愛上登山活動。

其實也沒有甚麼準備，就只是剛好有一天放假，拿起背囊及封了塵的裝備就出發了。地點選擇了西貢北潭凹附近的牛湖墩營地，那兒交通方便，亦鄰近麥理浩徑，平日亦較安全。
我們自駕到達北潭涌後，就轉乘94號巴士到北潭凹，其實只是坐三個站。如果由西貢出發，亦係一樣坐94號巴士，到達北潭凹站落車。
唔駛擔心，d相係濛的，因為爸爸唔記得左相機用左呢個效果。

出發了，跟著麥徑向赤徑的方向前進。

途中向小朋友講解一下花草樹木，亦解釋一下標距柱的用途，有意用可以怎樣求助等等，以減輕他的擔心。途中小朋友不斷問我點解咁多樹，d樹咁高，就俾左機會我解釋郊外的環境，對生態的用途點解要保護大自然等。

到達牛湖墩營地的入口，右轉上山就可以到達營地。路程為五分鐘。
到達營地之後，行下營地，解釋一下露營係怎樣的，為之後的露營預備一下。跟著我們便把帶來的食物爐具拿出來開始預備午餐。小朋友負責整理好餐具，安排在那兒進食等，而我就好努力咁煮煮煮，等佢快d有得食。所以食物都選擇左一d簡單的，通心粉加丸，同埋一杯好味的朱古力奶。

食飽之後，當然要講下垃圾的處理，同怎樣保護大自然啦。

準備好，可以再次出發，今次就係整個旅程最大的目標，要上一個山頂。

坦白講，我今次都失策左，因為我太耐無行過呢段路，原來周圍的植物已經生長的非常密，令到一個四歲的小朋友非常難行。我唯有減慢行進速度，亦同場加入教佢係樹林前進保護自己的方法。

終於到左山頂了，小朋友亦十分開心呢！完全感受到佢覺得自己成功左一個挑戰。

263呢個山頂唔係等別高，但係可以望晒赤徑同附近的山峰，十分之美麗。佢仲捉住我攞地圖講晒附近的山名俾佢知道。仲話下次要去蚺蛇尖！

呢張相係佢自己話要影的，話佢高過蚺蛇尖。最後食左個包，休息左一陣就回程了，因為山頂十分大風，記得著返件衫，但其實都頂唔到幾耐。

大獲，回程的路仲密過上山…最後有一段我抱住佢爆左陣林，其實大人就唔難行，不過對一個四歲來說就太難了，我唯有抱住佢穿越晒d樹叢。不過佢的信心開始建立，後尾仲要自己行，唔駛我拖住。

終於回到平地。其實如果有興趣去呢個地方的家長，可以諗下原路折返，其實難度就會減少好多。

等巴士返去北潭涌回家去。
整個旅程由起步計算，大概用左三個多小時。其實作為一個郊野體驗我覺得十分合適。不過帶小朋友去行山，有幾樣野要留意。

1. 由淺入深，唔好一次行d大勁既，唔係佢下次一定唔同你去。
2. 事先多一點簡介，等小朋友心中有個預算，遇到挑戰時亦會更易面對及應付，增加成功經驗的建立。
3. 記得帶備小食，糖果之類，係佢無心機時，或者肚餓時，呢d就係佢的推動力。
4. 最好自己預先去過那路段，咁樣你對會遇到的事或物有一個預算，方便你陪伴小朋友一同經歷。

下面附上地旅遊資訊俾大家有興趣的朋友。

北潭凹營地(漁護署)
交通：由 西 貢 市 巴 士 總 站 乘 94 號 巴 士 或 假 日 及 公 眾 假 期 由 鑽 石 山 巴 士 總 站 乘 96R 號 往 黃 石 碼 頭 巴 士 或 由 西 貢 市 巴 士 總 站 乘 7 號 往 海 下 專 線 小 巴 ， 在 北 潭 凹 下 車 。 沿 著 麥 理 浩 徑 第 二 段 往 赤 徑 方 向 前 行 ， 約 10 分 鐘 便 見 營 地 入 口 ， 再 右 上 沿 石 級 上 行 10 分 鐘 ， 便 可 抵 達 營 地 。 

如果之前有睇過我地個blog的朋友，台灣之旅我會好快整理返好，其實係呢兩年都去左另一次台灣，同好多地方。爸爸之後會得閒點，快快整理好資料俾大家睇下啦。