我們的快樂時光: 小惡魔玩轉高雄台中 (高雄篇1) 駁2藝術特區

講起上來，今次的旅程都幾突然。原本係諗住兩公婆自己去玩的，怎知道剛好遇到阿仔的同學仔約左去台灣，對於熱愛台灣的我，可以有機會同一班阿仔的同學去旅行，立即覺得係一樣好玩同好有挑戰的事情，所以就決定了參加逃學團。

我地總共有六個家庭參加，由買機票到出發，大概準備左三個月。其實都唔多野要準備，都係買機票、訂酒店、民宿，同埋其中一日去境的自駕要訂車。我地出來開左一次會就係咁多，其他事項都係wahtsapp攪掂晒。而我地頭兩日係高雄的有4個家庭，而有2個家庭係台中加入一齊玩到尾。

七日的行程，我地大約係準備咁玩的：
第一日：香港>高雄>旗津半島>晚上任選一商場或夜市
第二日：國立科學工藝博物館>兒童美術館>晚上任選一商場或夜市
第三日：壽山動物園>高鐵台中>酒店附近晚餐
第四日：國立自然科學博物館>國立臺灣美術館>晚上任選一商場或夜市
第五日：台中公園>自駕埔里午餐>清境民宿>小瑞士花園>清境晚餐
第六日：清清草原>羊咩咩脫衣秀>步步高昇步道>小瑞士花園>清境午餐>自駕回台中> 晚上任選一商場或夜市
第七日：台中買手信(太陽餅街)>清泉崗機場>香港

好似好完美吧！如果只係一家人去，或者兩三個小朋友一六去，其實應該無特別問題的。但係今次旅程之中，我地人多，每一個小朋友的生活習慣有不同，加上天氣變化、身體情況，原來最後都唔係可以諗得咁簡單。所以去到最後，我地的旅程係做左調整的。其實都係我地預期之內，大家係出發前已經有共識，就係會因應到時的情況而有所調動。加上今次大家的目標都係俾小朋友去下玩，簡單旅行，所以去少一兩個景點又無所謂，重要的係小朋友開心愉快就係了。

其實好早機，我地個朝係0650係機場集合，checkin後先一齊食早餐。好在依家機場開左好多餐廳，唔會無野好食。例行工事，當然係睇下飛機先啦！同學仔媽媽好好，同一班小朋友一路睇飛機，一路串英文字認航空公司，原來咁都可以學英文，真係學到野。

出發了！飛機餐唔影啦！都係個d野啦。不過小朋友看來仍未訓醒，好眼訓咁喎。

話咁快就到達高雄，攞完行李，要換錢的換錢，提款的提款，跟住我地就去酒店。高雄有一樣比台北優勝的地方，就係機場有鐵路直達的。對於我地扶老攜幼，又要睇住行李的家長來講，真係方便好多。唔係又要買機場巴士票，又要搵車站，又要上行李，又要睇住個細既，真係有點困難。

等捷運中，大家諗下。咁多個旅行箱，仲要坐巴士抬上抬落都幾煩。

剛好高雄做緊史努比65週年的展覽，可惜無機會去睇睇。

我地住既係高雄翰品酒店，這間酒店我地上一次來高雄已經住過，交通雖然唔係唔係三民區等較旺的區域，但係服務良好，配套亦十分好，價錢唔貴，好扺住。而且酒店的餐飲亦唔錯，值得一試。係Agoda的評分佢有8.5分的，相當不錯。而且近捷運鹽埕埔站，出站行2分鐘就到帶住小朋友真係唔錯的。記得要試佢地下日式餐廳的火鍋，扺食好味。

Agoda_翰品酒店高雄Chateau de Chine Hotel Kaohsiung

我地今次的旅程之中，正好遇到台灣下著大雨，這亦大大的影響了我們的行程安排。原本我地打算去旗津半島玩的，踏下單車，睇下風景。但係天氣十分之唔穩定，所以最後我地取消左旗津的行程。由於早機既關係，我地去到酒店都係中午一點幾，只係得一間房可以checkin。最後我地放晒所有行李入一間房，就去開餐啦。今次旅程發現高雄這兒原來好多地方都係星期一公休的，例如我地想去既科工館、美術館等。原本打算去酒店附近一間叫「金溫州餛飩大王」，但係佢星期一休息…帶住咁多小朋友，又肚餓，我地唯有係附近搵一間靚靚仔仔的餐廳就入左去了。

點解得一張相呢？因為這是我們在台灣的第一餐，亦係第一次咁多位小朋友坐埋一齊食飯。嘩！不得了，我簡直覺得人家想趕我地出去。嘈到呢，傾計啦，爭餐具啦，爭位啦。原來大家一齊去旅行連小朋友都好興奮，佢地既表現比係香港更加利害。好彩我地食飯的時候已經過左午餐的高峰時期，唔係一間好休閒既咖啡店應該會俾我地趕走晒所有客人。最後？大人當然無啖好食啦。所以亦令我地由晚餐開始對佢地採取左「分離政策」。

食飽飽，返到酒店亦已經有房了。我地分好房之後仍繼續大雨，安全起見，我地決定去附近的駁2藝術特區行下，睇下藝術品。其實仍然係時晴時雨，最後大家都濕晒。