201213 墾丁台北跨年七天之旅 Day4 (平溪線十分一日遊)

來到旅程的第四日，我地亦開始台北既旅程。
由於小朋友係鐵路迷的關係，我地亦安排左需要坐鐵路的旅程，等佢可以睇下唔同地方的火車鐵路係點樣的。
不過係我地計劃旅程既時候，原來諗少左一樣事情，亦令到第四日的旅程增加左難度同變數，好在最後都順利完成，至於係乜野，留返最後先講。

今日的目的地係十分、菁桐，睇下舊火車站同放天燈。其實今日的路線我地兩個大人曾經自己來台灣時已經試過，而且亦無乜特別難度，我地原本計劃一早去到台北車站買車票，先前往瑞芳車站，再轉平溪線往十分菁桐。但係當我地去到台北車站的時候，嘩！乜咁多人的，我地原朲打算係台北買「平溪線一日週遊卷」的，但真係太多人了，所以決定到了瑞芳先買。如果大家有興趣遊十分、菁桐或者去侯硐睇貓的，記住要買「平溪線一日週遊卷」，因為只係52元台幣，你可以係整條平溪線上上落落而唔需要再買票，對於一日想去晒咁多個地方的人來講，係好扺的。(其實大部份人都係一日去晒咁多個地方)

我知道買票的地方有兩個，一個係台北車站臺鐵的售票櫃位，另一個係瑞芳車站內購買就可以，其實邊一度都無乜分別，反而係視乎你自己旅程的安排。因為帶住小朋友，有時真係唔可以有咁多時間自己走圍走，如果順路經過台北車站，預先買早一日的車票亦係一件好事。

臺鐵一日週遊劵的資料

 指定動作必然係同列車影相啦~

當日整個車站都係多人到癲。

去到瑞芳車站都係一樣咁多人。最後我地係上唔到第一班車的，要係寒風下企係月台等下一班車。而一班車大約係要等四十五分鐘的…

因為用一日劵的關係，我地係可以隨意出入車站的，頂唔順出左去街邊的檔仔，買左熱豆漿同煎餅食，唔係的話，大人頂到小朋友都頂唔到。

平溪線觀光路線圖，大家可以參考一下。大部份人的主要景點都係侯硐、十分及菁桐。

列車時間表，這一張係由瑞芳去菁桐的。

這一張係由菁桐返瑞芳的，不過強烈建議大家上臺鐵的網頁查清楚先好出發，唔係有排等。
臺鐵列車時刻查詢系統

最後終於上到車，去到計劃中的第一站十分了，不過比原定時間遲左一小時有多…
而十分的人潮亦不比瑞芳差…

帶小朋友臨十分這地方，其實係十分特別的，因為係香港你唔可以係路軌上面行，亦唔會咁近距離見到列車經過，所以當日小朋友十分興奮呢！雖然之前的等待已經用晒佢的精力，不過來到十分之後，佢又再次有返活力。

係十分，除左睇列車之外，大部份人都會放天燈，觀光「十分大瀑布」，原本我地都打算去睇瀑布，不過那一天除左凍之外，仲有雨，所以我地最後決定唔行咁遠，係十分吃午飯同放下天燈就算了。

第一次近距離睇鐵路，小朋友好好奇點解可以就咁行過去…

放天燈，祈求一家幸福健康~
小朋友都有份寫架！雖然你唔明白佢寫乜就係了…
完成晒遊玩之後，又係時間搵野食，當日十分人山人海，我地隨便搵一間感覺乾淨的就入去了，而且小朋友已經好肚餓了。

食店的門口，還記得上次兩個人來都係這間店，不過當時係無人而且唔吸引的，幾年後已經變左了。

餐單

點了湯麵及小籠包，與小朋友外遊，湯麵白飯基本上都係主食，易入口，而且亦不會太濃味。我相信你也不想你的子女整個外遊當中都吃煎炸濃味吧！而且小朋友係這一次旅行時，還未夠三歲的，所以盡可能都把膳食清淡一點。

 午膳後，我地繼續十分的行程，帶小朋友行下香港無的吊橋，邊行邊搖都好特別架！當然唔少得近距離睇列車經過同行路軌啦！呢D都係香港唔會有機會嘗試的事情，而且係我地行緊路軌的時候，有列車經過，原來會有專人吹哨子，提醒大家有車經過，盡快離開路軌呢！

難得的合照，每次都係我影相，所以我上鏡的機會太少了！

完成十分的觀光後，原來已經係下午三點了，其實天未黑，還有時間去菁桐的，不過小朋友已經十分疲累，而且當我地見到齊個十分的人潮，月台上的人潮時，我地決定都係離開好了，再去菁桐的話，對小朋友只係惡夢，而唔係開心了。另一方面亦擔心再晚一點當大家一齊離開時，我地會坐唔到車，離開唔到瑞芳，到時又凍又要企係月台，真係唔死都凍病。

離開十分的列車。

回程的列車都十分擠擁，因為由菁桐開始回到瑞芳的人都不少，好在有有心人讓座給小朋友及媽媽，唔係佢地要係迫到似返工時間的列車上企到返瑞芳呢。而去到瑞芳的時候，我地選擇左較慢站站停的列車，等小朋友可以休息一下，媽媽抱住佢睡一覺。最後返到台北時都近傍晚，我地去左永康街的鼎泰豐食左一個豐富的晚餐，行左陣師大夜市，就回酒店休息，結束今日的旅程了。

在文章的開始時，曾經提過在計劃旅程的時候失算了，以至到今天的旅程失了預算，究竟我地無諗清楚的係乜野呢？心水清的朋友都應該估到，就係我地無諗過我地的旅行日期都係台灣當地的假日，而且年尾仲要係大假，好多人都一樣會去當地的旅遊熱點遊玩，唔止係遊客，而且當地人都會去。所以無論係交通、人流上，都比較我地係普通的日子來臨時會有極大的不同。好似我地今次的行程中，我地就遇到上唔到車被迫凍住係月台等車…食店太多人等位…景點太多人…連交通都受到影響。當然，如果幾個大人去旅行，其實都幾有趣的，最多當作與當地人一起感受下節日氣氛，但係當你帶住小朋友時，尤其係幼兒時，剛才以上的情況就立即不會成為趣味，而只係你與幼兒的痛苦。

當然，你覺得小朋友要就大人既話，我亦無話可說既。