坦白講，今次再同小朋友去旅行，整個旅程讓我感受良多。究竟帶小朋友去旅行係想一齊歡樂？還是害苦了他？係我係旅程當 同回程之後都有好好細想的問題。答案就等最後先講，去片先。
第一日首先一早就出發去機場，其實未夠六點叫醒個仔佢已經想殺左我地，不過為左可以十點幾到高雄，再去墾丁，早點出發都係需要既。好彩依家係機場其實已經乜都有，入閘後我地仲係翠華食左個好味的早餐。依家機場必左閘都有好多餐廳，記住唔好心急係出面食大快活…
第二次上飛機，阿B已經識得自己走去睇飛機同埋與飛機合照了。
好啦~上飛機了。
飛機起飛啦！好開心呀！
原來飛機係兒童餐係要係訂機位時order的，真係難為左阿B，陪我地食左個好咸的飛機餐。如果有帶小朋友上機的朋友要留意啦。一般來說，只要你係廿四小時前都可以預訂的，不同航空公司有不同政策同餐單，記住留意啦！
呢幾次去台灣的經驗，我都係落地先換台幣，其實係機場就有得換，非常方便。之前我亦已經BOOK好左車，落機後係機場服務枱找個姐姐幫手打電話，好快就已經有專車來接我們都汽車出租公司。今次我選左小馬租車，除左因為佢大間D，信心好點外，亦因為佢服務非常好，電郵來往亦非常迅速，啱晒心急的香港人。(其實我有問過其他公司的，例如網上找到的格上，但無回覆。)
係機場出面等一陣就有車了。
呢架就係我地今次係墾丁三日兩夜遊的愛車，其實我地有一日係唔會駕車的，不過有小朋友，交通方便亦係我地考慮的重要一環。所以雖然好似有點浪費，不過都租啦。
只要係租車時預時講定有小朋友同需要GPS，兩樣野都係連埋的。感覺上台灣的GPS亦做得好好，基本上都無帶左我唔知去邊，雖然有時好似行遠左就係了…
只要需入名稱，或者地點電話，就會自動導航，非常方便。而且由高雄駕去墾丁非常簡單，只要小心D，而你係香港又有一定駕駛經驗，無難度。
途中經過一間好靚仔的7-11，我地停左車，去個廁所，亦好好享受一下墾丁的陽光與大海。一望無際的海洋，真係好靚，係香港你永遠睇唔到。呢間7仔好得意，佢上面仲有一個大天台，可以俾人上去望下海，hea下，跑下。
因為呢個view，我好想係呢到定居…
好大的天台呢。
其實同小朋友去旅行，與其安排好多「大人」的景，反而安排一D可以俾佢跑，爬的地方還重要。一個三歲的小朋友其實唔係要景點吧…
唔知點解，阿B近期見到公仔就想要合照…
途中見到一隊廿三十人的單車隊，仲要有一架專車跟住佢地。令我又重新諗下台灣環島之夢。
慢慢駕駛，不經不覺就到左第一晚留宿的地點。今次我地揀左悠活兒童旅館，呢間野打正旗號做小朋友生意，裡面有不同卡通主題的房間，亦有不少俾小朋友玩的設施同活動。
登記櫃台，呢位服務員小姐非常親切，仲要係好靚女的台妹。
入住小朋友會送禮物，有畫冊同埋有晒咁多個房間主題的故事書，怕死你唔會再來。
今次揀左主題係「我的F1系列」。有不同的賽車，真的適合小朋友一家大細來臨。不過價錢就貴貴地，我搵左個平網訂，都要4000台幣一晚。不過地方好大，舒適，而且配套係為小朋友著想的。例如浴室，係有專為小朋友而設的馬桶。
館內亦有不同的設施與及活動供小朋友參加，開頭最吸引我的就係呢個遊戲室，有少量遊戲設施同埋好多圖書，如果喜歡睇書的小朋友我估可以係到留一整天。
勁大的疑似LEGO玩具。
呢個有不同感觀的嗅覺設施亦好特別，我地特別喜歡呢種讓小朋友探索世界的教育方法。
夏天的話，呢個勁大的水上設施應該好好玩。不過應該我地十二月去，亦有人係換晒泳裝，一家大細係到玩耍的。難道台灣的朋友不怕冷的？
最特別的，係佢會係每一節安排不同活動，有免費的，亦有付款的。我地參加左100台幣的畫班。點知原來係有一幅大牆，俾小朋友自由發揮的。而且當日算係平日，台灣無假期，所以旅館的住客較少，我地包左個活動一樣。
一個自由的世界，才是幼小成長最重要的元素。
有興趣可以上佢個網睇下：
悠活兒童旅館
不過夜晚個度係無乜野食的，而佢的餐廳亦未必會開放，所以最好入時問定邊間開，盡早打算。最後我地選擇左開車去墾丁大街一遊，話晒都叫去過墾丁…
我地揀左一間叫 Amys Cucina的餐廳，開頭諗住佢食西餐，pizza意粉之類，阿B可以有食到的東西。因為台灣夜市的食物其實真係唔係咁啱小朋友食…不過呢，呢間餐廳都真係好普通下，如果唔係有特別原因，其實唔食亦無乜選失…
地 址：屏東縣恆春鎮墾丁路131-1號
電 話：08-8861977
到此一遊。
其實阿B今朝一早起身，已經好累了…
最後係阿B堅持下，去埋出火。係的，係阿B堅持要去睇地下有火的地方…當我解釋完出火係點之後，佢就話要來。本來我地諗住回酒店休息的。不過有車，都好快je~
阿B：媽咪點解地下有火既？
人生第一次玩煙花。
膽粗粗俾佢試下點煙花，原來又好OK喎。不過記得買長的，咁小朋友容易攞上手玩，又無咁危險。
對於香港現今的小朋友來講，真係好開心同特別的經歷。
出火其實真係要夜晚來先係特別，出面有停車場，只要唔係假日，基本上都有好多位，假日就需要等一等，各位自駕的朋友應該會好方便。而且上面有小販賣煙花，炮谷之類物品，務求大家好好享用出火的天然資源。如果你地時間充裕一點，又無咁眼訓，其實去埋恒春市，食下小食，睇下古城都幾持別的。
就咁，第一日的旅程便在大家極眼訓的情況下結束了。
沒有留言:
張貼留言